唐家灣2017年清晨，“萬有全唐家灣小菜場”里，喧鬨中百味混雜。北方大廈對過個胡梯浪向，已經人軋人。望下看，攤連攤，販挨販，向南綿延三百余米，大小弄堂數不勝數四通八達；單胡梯上去個室內市場，也堪稱品種齊全，物美價廉。箇搭是大上海頂早個小菜場，没“之一”兩字，建於1903年。而大約莫100年前，替小菜場一般年紀個莊錫慶也來到了此地，見到了與現在相當個繁華。莊錫慶指垃小菜場東首個空地，對伊個父親講：“就迭搭，我房子造好，將來買小菜賽過霞飛路介便當。望東有白雲觀，朝南有惠中堂，走走儕弗到廿分鐘。我天天去拜，仙人或者上帝總歸會得保佑我生意吧！”莊錫慶個父親講：“其他儕好，但不過伊拉講斜橋南是墳墩。有眼近，風水弗大好吧？”莊錫慶講：“迭個有啥啦？講近也有段路要走唻。人總有一天要翹辮子個，離墳近，我個子孫送我葬還省得遠唻。”“儂隻小鬼頭只有幾歲啊？”莊父嘲嘲伊，“葛儂預備房子造啥樣子？”莊錫慶答：“必須是洋房，三層，頂少要十幾間。我花園里要種一棵白玉蘭，子子孫孫看到樹，儕可以想起我。”莊父繼續嘲：“小鬼摜派頭阿？儂將來結之婚也只有兩家頭，要介許多房間發癡？”莊錫慶胸一挺，講：“我要養大兒子、二兒子、三兒子...